पद त्याग्दै बाबुरामलले भनेको अन्तिम निर्णय हेर्नुहोस !!!

१५ असार," आफ्नै दलका नेताहरुलाई अचम्ममा पार्दै एकीकृत नेकपा माओवादीका उपाध्यक्ष एवं पूर्वप्रधानमन्त्री डा. बाबुराम भट्टराईले पार्टीबाट स्वेच्छिकरुपमा पदत्याग गर्नुभएको छ । ’यो मेरो अन्तिम निर्णय हो । मैले यसबारे कोहीसँग सल्लाह गरेको छैन । हिसिलालाई पनि भनेको छैन । केही गम्भीर निर्णय लिने बेलामा म राति सोच्ने गर्छु ।’ -भट्टराईले बैठकमा भनेको कुरा उधृत गर्दै स्रोतले भन्यो- ‘म ६० वर्ष पनि नाघें । अब कार्यकारी भएर बस्नुभन्दा पार्टी सदस्यमा बस्छु । यो मेरो स्वेच्छिक रुपमा पद त्याग हो, राजीनामा होइन ।’

एमाओवादी नेता भट्टराईले आफ्नो यो निर्णयलाई आफ्नै विवेकले गरेको अन्तिम निर्णय समेत बताउनुभएको छ । ‘ यो मेरो घुर्की हैन, यो आफ्नै विवेकले गरिएको अन्तिम निर्णय हो । अरुले पनि यही स्पिरिटलाई समाउनोस् ।’ शुक्रबार एमाओवादीको बैठकमा एमाओवादी अध्यक्ष प्रचण्डले केन्द्रीय समितिको प्रस्ताव प्रस्तुत गरेपछि पदका लागि ठूलो हंगामा मच्चिएको थियो । तर, शनिबार बैठकको प्रारम्भमै डा. भट्टराईले १५ मीनेटजतिको आफ्नो मन्तव्यमा पद त्यागको घोषणा गरेपछि एमाओवादीको अन्तरविरोधले नयाँ मोड लिएको छ ।

पार्टीमा जीवनभर प्रतिपक्ष

‘म ३५ वर्षमा पार्टीमा सधैं प्रतिपक्षमा रहें । सधैं विद्रोही रहें । विचार आस्थाको लडाइँमा सधैं अडिग भएर यहाँसम्म आएँ ।’ भट्टराईले बैठकमा भन्नुभयो । ’हामीले बनाउन खोजेको पार्टी यस्तो थिएन, हामीले सोचेजस्तो कम्युनिष्ट पार्टी बनाउन सकेनौं ।’ स्रोतअनुसार बाबुरामले बैठकमा भन्नुभयो- ‘यत्रो गृहकार्य गरेर अध्यक्षले ल्याएको प्रस्तावमा पनि हामीले साथीहरुलाई सहमत गारउन सकेनौं । धेरै गृहकार्य गरेर अध्यक्षले पेश गरेको प्रस्तावमा ९५ प्रतिशतले साथीहरुले असहमति जनाएको मैले आफ्नो ३५ वर्षे राजनीतिक जीवनमा पहिलोचोटि देखें ।’

कहाँबाट बिग्रियो ?

पार्टीमा जनमुक्ति सेनाका साथीहरुलाई नेतृत्वमा अगाडि ल्याउनुपर्ने बताउँदै भट्टराईले पार्टीको मरुदण्ड जनयुद्ध भएको बताउनुभयो । पार्टी एकता प्रक्रियाबाट बिगि्रन थालेको भट्टराईको विश्लेषण थियो । ’एकता प्रक्रियाबाट पार्टी बिग्रिन शुरु गरेको हो, हाम्रो ३५ जनाको कमिटी थियो, उतापट्टी ११ जनाको पोलिटब्यूरो थियो । ४५ जनाको मात्रै समिति बनाऔं भन्दा त्यसबेला सम्भव भएन । हामी अलि बढी लचिलो भयौं ।’ बैठकमा उहाँले भन्नुभयो, ‘त्यहीँबाट पार्टी बिग्रियो ।’

‘खड्का र ढुंगेललाई मात्रै मैले ल्याएँ’

डा. भट्टराईले पार्टीभित्र गुटबन्दी भएको भन्ने विषयलाई पनि आक्रमक प्रहार गर्नुभयो । ‘साथीहरुले गुटको कुरा गर्नुभयो, कहाँ छ गुट ? एउटा प्रमाण दिनोस् ।’ डा् भट्टराईले आफूले केन्द्रीइ समितिलाई दुईजनालाई मात्रै सिफारिस गरेको बताउनुभयो । एकजना औपचारिक शिक्षा नपाएकी र क्रान्तिकारी महिला भएकाले देवी खड्कालाई र दोस्रो सबैबाट खेदिएका पात्र भएकाले बालकृष्ण ढुंगेललाई केन्द्रमा प्रस्ताव गरेको बैठकमा बताउनुभयो । त्यस्तै युवा पुस्ताका तर, पुराना युवा नेता भए पनि पूर्वसभासद् हेमराज भण्डारीलाई भने चाहेर पनि केन्द्रमा ल्याउन नसकेको भट्टराईले बैठकमा बताउनुभयो ।

भट्टराईलाई नभाग्न आग्रह

बैठकमा बाबुरामले बोलेपछि वातावरण स्तब्ध भएको थियो । त्यसपछि ३/४ जना केन्द्रीय सदस्यहरुले बैठकमा आफ्ना कुरा राखेका थिए । उनीहरुले हामीले पदको बार्गेनिङ गरेका हैनौं, पद्धति हुनुपर्यो मात्र भनेका हौं भन्दै पार्टीमा समस्या आयो भन्दैमा छाडेर भाग्न पाइँदैन भन्दै बाबुरामको आलोचना गर्ने प्रयास गरेका थिए । तर, त्यतिकैमा बैठक आइतबार सम्मलाई स्थगित गरेर पदाधिकारी बैठकको आह्वान गरिएको थियो । पदाधिकारीले केही राज्यसमितिका इञ्चार्जसँग छलफल गरेर समितिलाई पूर्णता दिने प्रस्तावमा छलफल गरे पनि शनिबार निश्कर्षमा पुग्न सकेन ।

अब प्रचण्डमाथि नैतिक संकट

‘बाबुरामले केन्द्रीय समितिमा पद त्यागको निर्णयलाई अन्तिम बताइसक्नु भएकाले सो निर्णय उहाँले फिर्ता लिने सम्भावना देखिँदैन । अब प्रचण्डको प्रस्ताव पारित भएन भने उहाँको पद नै नैतिक संकटमा पर्छ । कम्युनिष्ट पार्टीको परम्पराअनुसार नेताको प्रस्ताव बहुमतबाट असफल भए नैतिकरुपमा राजीनामा दिनुपर्ने हुन्छ ।’ स्रोतले अनलाइनखबरसँग भन्यो- ‘आफ्नो प्रस्तावमा विरोध आएपछि बाबुरामले नैतिकरुपमा पद त्याग गरिसक्नुभयो, यसबाट अब प्रचण्डमाथि ठूलो नैतिक दबाव परेको छ ।’

संगठन विस्तारको प्रस्ताव प्रचण्डको साटो महासचिव पोष्टबहादुर बोगटीमार्फत् बैठकमा पेश गरिएको भए सो प्सताव असफल हुँदा बोगटीमा मात्रै नैतिक संकट आउने बताउँदै स्रोतले भन्यो- ‘प्रचण्डले आफैं अगाडि सर्नु नै ठूलो गल्ती भयो ।’